43歲李日朗正式宣布退出娛樂圈 曾遠赴印度體驗出家靜修

GIRLAV

現年43歲嘅李日朗（Don），2003年以歌手身份出道，並因拍攝TVB青春偶像劇《當四葉草碰上劍尖時》令人關注，及後與蔣雅文以情侶檔形式發展，不過發展平平。2010年與唱片公司完約後，選擇北上內地發展。近年佢淡出娛樂圈，任職國際塑顏術教師，擁有自己嘅店舖，親自為顧客進行小顏術之外，亦有收徒弟。活躍於社交平台嘅佢，日前拍片正式宣布退出娛樂圈。

李日朗喺社交網站上載影片，以「記得當時唱片同事說做這種歌是浪費錢…連宣傳都浪費時間…」為標題，表示自己已經離開咗娛樂圈，冇做歌手幾年，會喺平台翻唱以前嘅作品畀粉絲聽，之後就話歌曲《榕樹》係當年佢同張繼聰一齊作嚟悼念嫲嫲嘅歌 。

李日朗曾與蔣雅文、葉翠翠傳過緋聞；當年李日朗被傳媒拍攝到夜訪2005年港姐冠軍葉翠翠香閨，不過二人未有承認過戀情。李日朗2018年與細13歲模特兒女友黃靜藍拍拖，女方於2023年單方面向傳媒透露二人已結束5年情。早前佢遠赴印度體驗出家靜修，喺社交網站上載剃頭及修行生活照，直言：「還沒有習慣沒頭髮的自己」。引起網民熱烈討論。

有指李日朗因飽受情傷萌生出家決定， 喺印度逗留約兩至三星期嘅李日朗就於帖文表示此舉對家人有好處，因而嘗試一下，寫道：「這次跟不同地方的朋友約來印度，本計劃靜修和做義工，給繁忙的生活可以休息下，後來經過老師提點，如果有幸在這個佛教聖地落髮的話，除了自己，父母和朋友都可以得到很多的福氣，所以就有這個短暫『出家』的緣份。」

howardwo

禪心修佛