焚城｜60歲張達明抗癌成功罕有現身首映禮 被指身形再度消瘦惹人擔憂

GIRLAV

60歲張達明演出作品無數，演員以外更擔任過導演、編劇及監製，不過於2011年確診第三期鼻咽癌，需要接受化療及電療，展開長達7年嘅抗癌歷程。縱然抗癌成功，但治療期間不慎金屬中毒，體內含白金量係普通人嘅63倍，帶來後遺症，因化療及電療四肢變得無力及麻痺，活動能力大受影響，右耳聽力曾試過得返五成，左耳就得八成，身體狀況大不如前。張達明近年逐漸重投工作，早前更出席有份客串嘅電影《焚城》首映禮，不過被指身形再度比以往消瘦，身體狀況令人擔憂。

張達明客串演出電影《焚城》，即使戲份少，僅短短幾句對白，但仍相當重視，拍攝前不但默默練習走位，拍攝期間更積極睇playback，以及聽導演嘅講解。張達明拍完之後感謝一班工作人員，同時心存感恩表示︰「有工開已經好開心。」日前，張達明出席《焚城》首映禮，有網民於社交平台分享現場片段；從片段所見，張達明身形和面形都比之前更瘦，行動緩慢，不過仍樂於與現場粉絲合照，精神不俗，唔少網民都留言叫張達明加油，祝願佢身體健康。

其實早前張達明為胡楓（修哥）網台節目《修哥萬花筒》擔任嘉賓時已被指身形瘦削，而佢說話亦未完全清晰，惟與修哥傾偈期間表現開心，睇起嚟相當精神。張達明於鼻咽癌痊癒後，曾先後拍攝TVB劇集《狀王之王》和電影《100秒》以及演出舞台劇《豐子愷》，不過當時張達明坦言講對白有困難，又指體力和記台詞有啲吃力，但就表示一定會堅持下去。

howardwo

抗癌成功